सुर्खेत । दैलेखको चामुण्डा बिन्द्रासैनी नगरपालिका–३ पानीखोलामा श्रीमानले बञ्चरो प्रहार गर्दा श्रीमतीसहित तीन जनाको मृत्यु भएको छ। घटनामा एक बालक घाइते भएका छन्।
शनिबार बिहान करिब ९ः३५ बजे ३८ वर्षीय अम्बर सलामी मगरले घरायसी विवादका क्रममा श्रीमती र तीन सन्तानमाथि बञ्चरो प्रहार गरेका थिए।
घटनामा गम्भीर घाइते भएका १२ वर्षीय छोरा तपेन्द्र र ३ वर्षीया छोरी करिश्मालाई दुल्लु नगर अस्पताल पुर्याउँदा चिकित्सकले मृत घोषणा गरेका थिए।
त्यस्तै, गम्भीर घाइते ३५ वर्षीया श्रीमती मनिषा सलामी मगरको उपचारका क्रममा प्रदेश अस्पताल सुर्खेतमा मृत्यु भएको छ। ६ वर्षीय छोरा मिलन सलामी घाइते छन्। उनको प्रदेश अस्पतालमा उपचार भइरहेको छ।
घटनापछि प्रहरीले अम्बरलाई नियन्त्रणमा लिएको छ। घटनामा प्रयोग भएको बञ्चरोसमेत बरामद गरी थप अनुसन्धान भइरहेको जिल्ला प्रहरी कार्यालय दैलेखले जनाएको छ।







प्रतिक्रिया