काठमाडौं । देशभर जारी अविरल वर्षाका कारण मुख्य चार राजमार्ग पूर्णरूपमा अवरुद्ध भएका छन्। बाढी र पहिरोका कारण कर्णाली प्रदेशका दुई मुख्य मार्ग कर्णाली करिडोर र भेरी करिडोरमा पूर्णरूपमा यातायात ठप्प छ।

हुम्लाको सिमकोट क्षेत्रमा आएको पहिरोले कर्णाली करिडोर पूर्णरूपमा अवरुद्ध बनाएको छ। यस्तै, रुकुमपश्चिमको आठबीसकोट नगरपालिका–६ स्थित रिजिगार क्षेत्रमा आएको बाढीका कारण भेरी करिडोर अन्तर्गत जाजरकोट–डोल्पा सडक अवरुद्ध भएको हो। पूर्वी नेपालमा पनि कोशी राजमार्ग प्रभावित बनेको छ। संखुवासभाको भोटखोला गाउँपालिका–४ बरुण क्षेत्रमा पहिरो आएपछि कोशी राजमार्ग पूर्णरूपमा बन्द भएको जिल्ला प्रहरी कार्यालयले जानकारी दिएको छ।

यसैबीच, उत्तरतर्फ रसुवाको गोसाइकुण्ड गाउँपालिका–२ मा नेपाल–चीन सिमानामा रहेको पुलमा बाढीका कारण जोखिम बढेपछि सो क्षेत्रको यातायात पनि पूर्णरूपमा अवरुद्ध भएको प्रहरीले जनाएको छ। शनिबार बिहान १०:३० बजेसम्मको प्रहरीको अद्यावधिक विवरणअनुसार काठमाडौंको टोखा–२ मा पर्ने काठमाडौं–नुवाकोट सडक, बागलुङ र नवलपरासी (पूर्व) मा पर्ने कालीगण्डकी करिडोर तथा रोल्पाको परिवर्तन गाउँपालिका–५ ग्रामजिमस्थित सहिद राजमार्ग भने एकतर्फी सञ्चालनमा छन्।

संबन्धित स्थानहरूमा सडक खुलाउने प्रयास तीव्र गतिमा भइरहेको छ। सुरक्षाकर्मी, प्राविधिक टोली र स्थानीयवासीको सहयोगमा माटो हटाउने, डाइभर्सन निर्माण गर्ने तथा वैकल्पिक मार्गको पहिचान गर्ने कार्य अगाडि बढाइएको छ। प्रहरीले अत्यावश्यक कामबाहेक पहिरो र बाढी प्रभावित क्षेत्रतर्फ नजान र सचेत रहन सार्वजनिक अनुरोध समेत गरेको छ।