धुलिखेल, १२ भदौँः काभ्रेको पाँचखाल नगरपालिकाले अत्यावश्यक बाहेकका सबै सेवा आगामी १७ गतेसम्म बन्द गर्ने निर्णय गरेको छ । आज भर्चुअल प्रविधि मार्फत बसेको बैठकले १७ गतेसम्म सेवा बन्द लम्ब्याउने निर्णय गरेको हो ।

यसअघिको बैठकले आजसम्मका लागि अत्यावश्यक बाहेकका सबै सेवा बन्द गर्ने निर्णय गरेको थियो । कोरोना भाइरसको रोकथाम तथा नियन्त्रणका लागि यस्ता निर्णय गरिएको नगरप्रमुख महेश खरेलले जानकरी दिनुभयो । बैठकले यसअघिका निर्णयहरुलाई थप कडाईका साथ कार्यान्वयन गर्ने निर्णय पनि गरेको छ ।

नगरपालिकाको यो निर्णयसँगै पसल, उद्योग, कलकारना १७ गतेसम्म बन्द हुनेछन् । तरकारी, दूध, फलफूल, एम्बुलेन्स, खानेपानी, सरसफाई जस्ता अति आवश्यक पर्ने सवारी साधनमात्रै चल्न पाउने छ । नगरपालिकाले कोरोना नियन्त्रणका लागि हदैँसम्मका सुरक्षित उपाय आपनाउन आफ्ना नगरबासीलाई अपिल गरेको छ । आजको बैठकले नगरपालिका र वडा कार्यालयमा न्यूनतम कर्मचारी परिचालन गरि सेवा दिने तालिकालाई निरन्तरता दिने निर्णय पनि गरेको छ ।