बनेपा १ साउन । काभ्रेको बनेपा नगरपालिका वडा नंं ६ मा पर्ने सहिदमार्ग भएर गोसाईस्थान जाने सडकको केही भाग कालोपत्रे गरिएको छ । वडाको काभ्रे बहुमुखी क्याम्पसदेखि २ सय ६१ मिटर भाग कालोपत्रे गर्ने काम सम्पन्न गरिएको हो ।

सडक कालोपत्रे गर्नका लागि बनेपा नगरपालिकाले ३० लाख बजेट उपलब्ध गराएको थियो । उपभोक्ता समितिमार्फत कालोपत्रे गरिएको नगरस्तरीय उक्त योजनामा उपभोक्ताको ५ लाख ३६ हजार ६ सय १५ सहभागिता रहेको वडाअध्यक्ष सचितानन्द के.सी.ले जनाएका छन् ।

नगरको उक्त सडकको वडास्तरीय उपभोक्ताहरुको भेलाले वडाबासी महिला रेश्मा थापालाई उपभोक्ता समितिको अध्यक्षमा चयन गरी सडक पीच गर्ने कामको थालनी गरेका थिए । उपभोक्ता समितिमा महिलाद्वारा अगुवाई गरी कमै योजनाहरु सम्पन्न हुने गरेका छन् ।

विभिन्न सामाजिक गतिविधिहरुमा सक्रिय सहभागिता जनाउँदै आएकी उपभोक्ता समितिकी अध्यक्ष थापा सहित सचिव शिवप्रसाद पौडेल र कोषाध्यक्ष प्रेमप्रसाद सत्यालले सडकलाई पक्की बनाउन सक्रिय भूमिका निर्वाह गरी योजना सम्पन्न भएको स्थानीय उपभोक्ताहरुले बताएका छन् ।

सडकको स्तरोन्नतीका लागि वडाअध्यक्ष सचितानन्द के.सी.को पहलमा बागमति प्रदेशबाट बजेटको व्यवस्था भएको थियो ।