धुलिखेल, २९ मंसिर सिन्धुपाल्चोकमा बस दुर्घटना भएको छ । दोलखाको  कालिञ्चोक दर्शन गरी काठमाण्डौ तर्फ आउँदै गरेको रिजर्भ बस सिन्धुपाल्चोकको सुनकोशी गाउँपालिका५ को ६ किलो माथिल्लो स्वारा भन्ने ठाउँमा दुर्घटनामा परेको वडा नम्बर ७ का वडाध्यक्ष ईश्वर तिमल्सिनाले जानकारी दिए । उनका अनुसार बस माथिल्लो मोडबाट तल्लो मोडमा आइपुगेको छ । प्रहरी घटना स्थलमा पुगेको छ । बा ४ ख ४४६८ नम्बरको दुर्घटनामा परेको हो । उद्दार भइरहेकाले मृतकको संख्या यकिन भइसकेको छैन ।

बसमा ४२ देखि ४५ जना सवार रहेको अनुमान गरिएको छ ।

सिन्धुपाल्चोकमा एक महिनाको बीचमा भएको यो अर्को दुर्घटना हो । गत कात्तिकमा सुकुटेमा बस दुर्घटना हुँदा १७ जनाको ज्यान गएको थियो । त्यसअघि असोज २४ मा पनि बा २ ख २७१५ नम्बरको बस इन्द्रवाती गाउँपालिका १०, बडहरे झिल्के मोडमा दुर्घटना भएको थियो । जसमा दर्जन बढीको ज्यान गएको थियो ।