धुलिखेल २६ मंसिर काभ्रेमा पछिल्लो समय विद्यूत चोरी गर्नेको संख्या निकै कम हुदैँ गएको छ । बनेपा स्थित नेपाल विद्यूत प्राधिकरणका प्रमूख रञ्जनराज गुरुङका अनुसार हाल जिल्लामा विद्यूत चुहावट १७ प्रतिशत मात्रै छ ।

१० महिना अघि २४ प्रतिशत चुहावट हुदैँ आएको थियो । चालु आर्थिक वर्षको १० महिना अवधिमा विद्यूत चोरी गर्नेबाट १० लाख रुपैयाँ रकम संकलन भएको प्रमूख गुरुङले जानकारी दिनुभयो । जिल्लामा २६ करोड रुपैयाँ विद्यूत महशुल संकलन हुन बाँकी छ । त्यसमा सडक बत्तीको मात्रै १४ करोड रुपैयाँ रहेको छ ।

काभ्रेमा दुई वटा वितरण केन्द्र छन् । पाँचखालमा रहेको वितरण केन्द्र अन्तर्गत २ करोड र बनेपा वितरण केन्द्र मार्फत २४ करोड रकम संकलन बाँकी रहेका हुन् । १३ स्थानीय तह मध्ये पाँचखाल वितरण केन्द्रमा पाँचखाल नगरपालिका, मण्डनदेउपुर नगरापालिका, भुम्लु, चौरीदेउराली र तेमाल गाउँपालिका पर्छन् ।

त्यस्तै बनेपा वितरण केन्द्रमा धुलिखेल, पनौती, बनेपा र नमोबुद्ध नगरपालिका, बेथानचोक, रोशी, खानीखोला र महाभारत गाउँपालिका रहेका छन् । विद्यूत महशुल संकलनका लागि बनेपा, पनौती, धुलिखेल, भकुण्डे र पाँचखाल गरी ५ ठाउँमा महशुल काउण्टर राखिएको छ । तर भौगोलिक विकटताका कारण समयमै महशुल संकलन हुन नसकेको काभ्रे वितरण केन्द्रका प्रमूख गुरुङले बताए ।