काठमाडौं । अविरल वर्षाका कारण पृथ्वी राजमार्गअन्तर्गत धादिङ खण्डका विभिन्न सात स्थानमा पहिरो खसेपछि यातायात प्रभावित भएको छ।

जिल्ला प्रहरी कार्यालय धादिङका सूचना अधिकारी एवं डीएसपी प्रकाश दाहालका अनुसार कृष्णभिर, परेवाभिर, ज्यामिरेघाट, जहरे, जवाङखोला, तिगराङ खोला र कमेरेभिरमा पहिरो खसेको हो। पहिरोका कारण कृष्णभिर र तिगराङ खोलामा सडक दुईतर्फी नै अवरुद्ध भएको छ। अन्य स्थानमा भने एकतर्फी रूपमा सवारी सञ्चालन भइरहेको प्रहरीले जनाएको छ।

कृष्णभिरमा पहिरो ठूलो भएकाले सडक खुलाउन दुईवटा उपकरण प्रयोग गरी पहिरो पन्छाउने काम भइरहेको डीएसपी दाहालले बताएका छन्।अविरल वर्षाका कारण पृथ्वी राजमार्गका विभिन्न खण्डमा पहिरो खस्ने क्रम बढेपछि प्रहरीले यात्रुलाई सावधानी अपनाउन आग्रह गरेको छ। सडक खुलाउने काम भइरहे पनि थप वर्षा भए पहिरो खस्ने जोखिम कायमै रहेकाले राजमार्गमा यात्रा गर्ने सवारी तथा यात्रुले आवश्यक सतर्कता अपनाउनुपर्ने प्रहरीले जनाएको छ।