काठमाडौं । काठमाडौँ उपत्यकामा यस वर्ष असोज अन्तिम सातादेखि मात्रै मेलम्चीको पानी आपूर्ति सुरु हुने भएको छ। मेलम्ची खानेपानी विकास समितिका कार्यकारी निर्देशक जगन्नाथ दासका अनुसार वर्षाका कारण मेलम्चीमा पानीको बहाव बढेकोले दसैँअगाडि पानी काठमाडौं ल्याउन सम्भव नभएको हो।

दासले भने, “पानीको बहाव घटेपछि मात्र वितरणको तयारी सुरु हुनेछ।” असार १ गते मेलम्ची खोलामा आएको बाढीपहिरोले आयोजना पूर्ण रूपमा क्षतिग्रस्त भएपछि हिउँदमा मात्रै पानी वितरण हुँदै आएको थियो । हाल रिबर्मा खोलाबाट दैनिक ६–७ करोड लिटर पानी काठमाडौंमा पठाइँदै आएको छ। पूर्वमा मेलम्चीबाट दैनिक १७–१८ करोड लिटर पानी आपूर्ति हुँदै आएको थियो ।

काठमाडौँ उपत्यका खानेपानी लिमिटेड (केयुकेएल) का कार्यकारी निर्देशक अशोककुमार पौडेलका अनुसार उपत्यकामा दैनिक ४३ करोड लिटर पानीको माग छ, तर हाल विभिन्न स्रोतबाट मात्र १३–१४ करोड लिटर पानी उपलब्ध भइरहेको छ।