काठमाडौं । जेनजी आन्दोलनले निम्त्याएको हिंसा र आगजनीबीच राजधानी काठमाडौंको कोटेश्वरस्थित भाटभटेनी सुपरमार्केटको भग्नावशेषबाट एक जना व्यक्तिको डढेको शव फेला परेको छ।
जिल्ला प्रहरी परिसर, काठमाडौंका प्रवक्ता एसपी अपिलराज बोहराका अनुसार बुधबार बिहान खोजतलासको क्रममा पूर्ण रूपमा जलेको अवस्थामा शव फेला परेको हो। “पहिचान असम्भव हुने गरी शरीर जलेको छ,” एसपी बोहराले अनलाइनखबरसँग भने, “शवलाई पोस्टमार्टमका लागि महाराजगञ्जस्थित त्रिवि शिक्षण अस्पताल पठाइएको छ।”
यो घटनासँगै जेनजी आन्दोलनको क्रममा मृत्यु हुनेको संख्या ७४ पुगेको पुष्टि भएको छ। यसअघि देशभरि भएका प्रदर्शन, झडप र आगजनीका क्रममा ७३ जनाको मृत्यु भइसकेको थियो।
पहिचानविहीन शवहरूको संख्या बढ्दै
यसअघि पनि चुच्चेपाटीस्थित भाटभटेनी सुपरमार्केटको आगलागीपछि डढेको अवस्थामा ७ वटा शव फेला परेका थिए। ती शवहरू अस्थिपञ्जरको अवस्थामा भेटिएपछि पहिचानमा समस्या आएको छ। कोटेश्वरमा फेला परेको शव पनि पहिचान हुन नसक्ने अवस्थामा रहेकाले डीएनए परीक्षणको बाटो अपनाइने प्रहरी स्रोतले जनाएको छ।
भाटभटेनीहरू आन्दोलनको केन्द्रबिन्दुमा
जेनजी आन्दोलनका क्रममा भाटभटेनी सुपरमार्केटहरू प्रमुख निशाना बनेका छन्। आन्दोलनकारीहरूले कोटेश्वर, चुच्चेपाटी, कलंकी, पुलचोक, चाबहिललगायतका शाखामा तोडफोड र आगजनी गरेका छन्। प्रहरीका अनुसार आन्दोलनकारीहरू व्यवसायी र नेताहरूको नजिकको सम्बन्धप्रति आक्रोशित छन्।
मानव अधिकार समूहहरूको चासो
मानव अधिकार आयोग, नागरिक समाज र अन्तर्राष्ट्रिय नियोगहरूले आन्दोलनका क्रममा भएको मानवीय क्षति र राज्यद्वारा प्रयोग भएको बलप्रति गम्भीर चासो व्यक्त गरेका छन्। मृतकहरूको पहिचान, निष्पक्ष छानबिन र पीडित परिवारलाई न्याय दिलाउन व्यापक माग उठिरहेको छ।
यता सरकार र सुरक्षा संयन्त्र भने आन्दोलन नियन्त्रणमा पुर्याउनतर्फ केन्द्रित देखिन्छ। तर सार्वजनिक रूपमा जिम्मेवारी लिने नेतृत्वको अभाव र जनताको मागप्रति चासो नदेखिएको आरोप लाग्दै आएको छ।
प्रतिक्रिया