सिन्धुली: नेकपा एमालेका उपमहाचिव प्रदीप ज्ञवालीले हामीलाई लड़ाई र झगडा होइन, विकास र समृद्धि चाहिएको बताउनु भएको छ ।

नेकपा एमाले सिन्धुलीको आठौ जिल्ला अधिवेशन प्रतिनिधि परिषद्को दोश्रो बैठकलाई प्रमुख अतिथिका रुपमा संबोधन गर्दै सो कुरा बताउनु भएको हो । उहाँले नेपालको अर्थतन्त्र लयमा फर्किएको र दुई छिमेकी देश चीन र भारत संग लड़ाई झगडा गरेर होइन, आपसी सहकार्य गरेर विकास र समृद्धिको राष्ट्रिय आकांक्षा पुरा गराउन जरुरी भएको बताउनु भयो ।

कुनै पनि नामको हिंसा अस्विकार्य भएको बताउँदै हामीले चीनसँग विआरआई सम्झौता गरेको र भारतले पनि त्यस्तै लिएर आए हामीले स्वीकार्ने बताउनुभयो । हामी विश्व अर्थतन्त्रको नेतृत्व गरेको चीन र चौथो बन्दै गरेको भारत संग झगडा होइन, सहकार्य गरेर अगाडि बढ्न जरुरी भएको बताउँदै नेता ज्ञवालीले दुई ठूला देशबाट फाइदा लिन सक्नु पर्ने बताउनुभयो । सरकारले बढ्दै गएको चरम निराशा लाई चिर्दै गएको बताउँदै उहाँले नेपालको राजनीतिलाई प्रचण्डले लंगुर बुर्जा बनाएको उल्लेख गर्नुभयो । माओवादी प्रवृत्तिले नेपालको विकास र समृद्धि मात्रै होइन, कम्युनिस्ट आन्दोलन पनि अगाडि बढ्न नसक्ने प्रस्ट पार्नु भयो । नेकपा एमालेले मात्रै राष्ट्रिय राजनीतिलाई देश हितको बाटोमा दोहोर्याएको बताउँदै उपमहासचिव ज्ञवालीले एमालेले नन्द किशोर पुनलाई राष्ट्रपति बनाउन भन्दा माओवादी अध्यक्ष प्रचण्डले नमानेको खुलासा गर्नुभयो । ३२ सीट जितेको माओवादी देश हित भन्दा विदेशी हितका लागि काम गरिरहेको बताउनुभयो । पार्टीबाट अवसर पाएकहरूबाट सबै भन्दा बढी समस्या भएको बताउँदै उहाँले अगाडि जे आयो त्यही छोड्दै नछोड्ने प्रवृत्ति एमालेको मुख्य चुनौती बनेको बताउनुभयो ।

एजेण्डाका आधारमा नभई अवसरले गाजेकाहरुले आफ्नै घरमा आगो लगाउन खोजिरहेको उल्लेख गर्दै उहाँले सिन्धुलीको नेतृत्वका बीचमा समझदारी हुँदा कुनै पार्टी र व्यक्तिले च्याउनै नपाउने बताउनुभयो । सबैजना मिलेर जाँदा सबै कुरा प्राप्त हुने प्रष्ट पार्दै ज्ञवालीले पार्टी कमिटी पार्टी सदस्यसँग जिम्मेवार बन्नै पर्ने बताउँदै प्रतिनिधि परिषद् सदस्यले जिल्ला नेतृत्वलाई दिशा नीर्देश गर्न सुझाव दिनुभयो ।

कार्यक्रमलाई संबोधन गर्दै नेकपा एमाले सिन्धुलीका इन्चार्ज मनोज जंग थापाले एमाले माथि चौतर्फी आक्रमण भए पनि उनीहरू सफल नहुने बताउँदै २ हजार पार्टी सदस्य बढाउने पालिका कमिटीका नेताहरू लाई धन्यवाद दिनुभयो । एमाले सिन्धुलीमा अहिले आकर्षणको केन्द्र बनिरहेको बताउँदै नेता थापाले विधि, पद्धति र लेनिनबादी संगठन पद्धतिबाट नेकपा एमाले चलिरहेको बताउनुभयो । बैठकमा राजनैतिक र सांगठनिक प्रतिवेदन प्रस्तुत गरिएको थियो । सो प्रतिवेदन ऊपर समूह विभाजन गराएर छलफल भएको र महत्त्व पूर्ण सुझाब प्राप्त भएको प्रचार विभाग प्रमुख कर्ण घिसिङले जानकारी दिनुभयो ।