काठमाडौं ३ भदौ : नेपाल पत्रकार महासंघका सभापति विपुल पोखरेलले राज्यले सूचना आयोगको आकार र बजेट सबै खुम्च्याउँदै लगेको बताएका छन् ।

राष्ट्रिय सूचना दिवसको अवसरमा आइतबार काठमाडौंमा आयोजित कार्यक्रममा सभापति पोखरेलले सूचना आयोगलाई संवैधानिक हैसियत प्रदान गर्नुभन्दा त्यसलाई खुम्चाउँने काम गरेको भन्दै सूचना आयोग बलियो बनाउँने सन्दर्भमा काम गर्न ध्यानाकर्षण गराए उनले भने, लोकतन्त्रको लाभ जनताले प्रयोग गर्ने सन्दर्भमा सूचनाको हकको अभ्यास एउटा महत्वपूर्ण पक्ष हो । सूचना आयोगलाई संवैधानिक हैसियत प्रदान गर्नुपर्छ भनेर भन्छौ, तर यसको आकार, बजेट सबै खुम्चाउँदै गएको अवस्था छ । राज्यको सूचना आयोगलाई हेर्ने दृष्टिकोणमा नै भिन्नता देखिएको छ । सूचना आयोग बलियो बनाउँने सन्दर्भमा काम गर्न जरुरी भएको भन्दै ध्यानाकर्षण गराउँन चाहन्छु ।

सभापति पोखरेलले सूचनाको हकको जति बढी प्रयोग हुन्छ, राज्य त्यति नै पारदर्शी र जनउत्तरदायी हुने भन्दै यसबाट नागरिक र राज्यबीचको सम्बन्ध पनि सुमधुर हुने विश्वास लिएको बताए । उनले सूचनाको हकको अभ्यासको सन्दर्भमा राज्यका संरचनाहरुमा प्रतिवद्धताको खाँचो भएको बताए । राज्यका सबै संस्थाहरुले सूचनाको हकको कुरामा गम्भीर भएर प्रविद्धता व्यक्त गर्न पनि उनको आग्रह थियो ।

सभापति पोखरेलले भने, सूचनाको हकको सन्दर्भमा राज्य पक्षसँग जति बलियो प्रतिवद्धता हुनुपर्ने थियो त्यति अझै पनि हामीले पाउँन सकेका छैनौ । सूचनाको हकको अभ्यास गर्नुपर्ने सन्दर्भमा राज्यका संरचनाहरुमा अझ बढी प्रतिवद्धताको खाँचो छ । सूचना अझै दिनु र भन्ने खालको वातावरण भएको कारण यसलाई प्रचलनमा ल्याउँनको लागि समस्या भएको छ ।

राज्यका सबै संस्थाहरुले सूचनाको हकको कुरालाई गम्भीर भएर काम गर्ने प्रतिवद्धता व्यक्त गर्नुपर्छ भनेर आग्रह गर्न चाहन्छु ।
उनले सूचनाको हकको प्रयोग गरेर तथ्यमा आधारित समाचार सम्प्रेषण गर्दै पत्रकारिताको विश्वसनीयता अभिवृद्धि गर्ने सबैलाई आग्रह पनि गरे ।