काठमाडौं ३० माघ । बलात्कार, महिला हिंसा लगायतका घटनाको विरोध गर्दै काठमाडौंमा ‘सिंहदरबार महिला मार्च’ निकालिएको छ । बृहत नागरिक आन्दोलनको अगुवाईमा सिंहदरबारमा शुक्रबार महिला मार्च निकालिएको हो ।

बसन्तपुरबाट सुरु भएको मार्च रत्नपार्क हुँदै सिंहदरबार पुगेर टुंगिएको थियो । कालो कपडा लगाएर महिलाहरु मार्चमा सहभागी भएका थिए । उनीहरुले ‘बलात्कार खुलेआम बलात्कृत गुमनाम’, ‘ए हजुर एउटा प्रश्न सोध्न पाइन्छ, हामीलाई स्वास फेर्न कसको अनुमति चाहिन्छ ?’ जस्ता नारा लगाएका थिए ।

‘प्रतिगमनविरुद्ध बृहत् नागरिक आन्दोलन’ नामको ब्यानरमा प्रदर्शनमा उत्रिएका उनीहरूले महिला हिंसा बन्द गर्न, बलात्कारीलाई सजाय दिन, हत्यारा पहिचान गरी कारबाही गर्न माग गरेका थिए । मार्चमा सहभागीहरूले प्रतिकात्मक रूपमा शवयात्रा पनि गरेका थिए । टाउकोमा सेतो कपडा बेरेर सेतो धोती लगाएका केही युवाहरूले प्रतिकात्मक शवलाई बोकेर शवयात्रा गरेका थिए ।

महिला मार्चमा सहभागीहरुले बलात्कारपछि हत्या गरिएका कञ्चनपुरकी निर्मला पन्त, बैतडीकी भागरथी भट्ट लगायतलाई न्यायको माग गरेका छन् । दिनहुँ महिला एवं बालिकाहरू असुरक्षित रहँदा पनि सरकारले उनीहरूलाई न्याय दिन नसकेको भन्दै सरकारलाई खबरदारी गरेका छन् ।