काठमाडौं, २५ मंसिर । कोरोना महामारीपछि बन्द काठमाडौं–दिल्ली उडानहरु सञ्चालनमा आउने भएको छ ।

नेपाल र भारत सरकारबीच दुई देशका राजधानीबीच हवाइ उडान पुन शुरु गर्ने सहमति भएको नेपालस्थित भारतीय दूतावासले जनाएको छ । हालका लागि एयर ट्रान्सपोर्ट बबल मेकानिज्म अनुसार उडान गर्न लागिएको हो । सो व्यवस्था अनुसार ती उडानमा हाल नेपाल र भारतका नागरिकहरु मात्र उड्न पाउने छन् ।

‘दिल्ली र काठमाडौंबीच उडान शुरु गर्न दुवै सरकारले स्वीकृति दिएको जानकारी गराउन पाउँदा खुशी लागेको छ,’ दूतावासले भनेको छ । अहिले एयर इण्डिया र नेपाल एयरलाइन्सले दैनिक उडान गर्नेछन् । भारतको उडान खुलेसँगै अब ९ महिनासम्म रोकिएका यात्रुले नियमित यात्रा गर्न पाउने भएका छन् ।

एयर बबल अवधारणा भारतले कोरोना भाइरसको संक्रमणपछि मुलुकहरुले आफ्ना नागरिकलाई लैजान सक्ने गरी ल्याएको अवधारणा हो । यस स्किमअन्तर्गत नेपाल आउने यात्रुले यात्रु थाल्नु अगाडि नै अन्तर्राष्ट्रिय ट्राभल अनलाइन फारम भर्नुपर्ने छ । उक्त उडान भरे र विमानमा बोर्डिङ हुने समयभन्दा बढीमा ७२ घण्टा अघिको पीसीआर रिर्पोट नेगेटिभ भएका यात्रुलाई मात्र नेपाल ल्याउन पाइने गरी मन्त्रिपरिषद्ले शर्त तोकेको छ ।