धुलिखेल, २७ असारः सिन्धुपाल्चोक जिल्लाको भोटेकोशी गाउँपालिकाको लार्चा पहिरोमा हिजो बिहान बेपत्ता हुनुभएका ४० वर्षीय नाङचे मगरको जीवितै उद्धार गरिएको छ । मगरको आज जीवितै उद्धार गरिएको नायब उपरीक्षक माधवप्रसाद काफलेले जानकारी दिनुभयो । घाइते अवस्थामा भेटिनुभएका मगरेको स्थानीय स्वास्थ्यचौकीमा उपचार भइरहेको छ ।

यसैबीच जिल्लाको बाह्रबिसे नगरपालिका वडा नम्बर ५ जम्बुमा बुधबार राति गएको बाढीपहिरोमा बेपत्ता भएका २० जनाको खोजी गर्न कठिनाई भएको छ । लगातारको वर्षाले सडक अवरुद्ध हुदाँ कठिनाइ उत्पन्न भएको हो । राजधानीबाट पुगेका २५ जनाको उद्धारटोलीसहितका सुरक्षाकर्मीले आज पनि खाजी कार्यलाई जारी राखेकोे प्रमुख जिल्ला अधिकारी उमेशकुमार ढकालले जानकारी दिनुभयो ।

लगातारको वर्षासँगै आएको बाढीपहिरोबाट जिल्लामा हालसम्म ५२ घरमा क्षति पुगेको छ । जिल्लामा बेपत्ताको संख्या २१ पुगेको प्रहरीले जनाएको छ । त्यस्तै लगातारको वर्षाले बुधबार राति आएको सुनकोशी नदीको बाढीले कटान गरेको अरनिको राजमार्गको जुरेमा सडक खुलाउने काम भइरहेको छ ।