धुलिखेल, २४ असारः पाँचखाल नगरपालिकामा पर्ने पलाञ्चोक भगवती मन्दिरलाई विश्व सम्पदा सूचिमा सूचिकृत गर्न नगरपालिकाले विषेश पहल गर्ने भएको छ । भगवती क्षेत्रको विकास गर्नको लागि गुरु योजना नै बनाउन नगरप्रमुख महेश खरेलले नगरपालिकाको ७ औँ नगरसभामा नीति तथा कार्यक्रम प्रस्तुत गर्नुभएको छ ।

आगामी आर्थिक बर्ष २०७६/७७ मा साँकृतिक तथा पर्यटन कार्यक्रम अन्र्तगत पलाञ्चोक भगवतसँगै सय बर्ष भन्दा बढी पुराना दुग्धेश्वर मन्दिर, धनलक्ष्मी, सुवर्णेश्वर महादेव मन्दिर तथा कोटदेवी लगायतका पुरातनत्विक धार्मिक स्थल र गुम्बालाई संरक्षणमा प्राथमिकता दिइने भएको छ ।

यसैगरी धार्मिक स्थललाई पर्यटकीय कुरामा जोड्दैँ दुग्धेश्वर मन्दिरमा पिकनिक स्पोट बनाउने र पलाञ्चोक भगवती तथा धनलक्ष्मी डाँडालाई केन्द्र बनाई प्याराग्लाईडिङको संम्भाव्यताको समेत अध्ययन गरिने भएको छ । नगरपालिका भित्रका पर्यटकिय, धार्मिक, सामाजिक, साँस्कृतिक तथा मौलिक परम्परा झल्कने श्रव्यदृष्य बनाई प्रचारप्रसार गर्ने कार्यक्रम पनि नीति तथा कार्यक्रम राखिएको छ ।