धुलिखेल, २७ जेठः धुलिखेल नगरपालिका वडा नम्बर ३ को ऐसेलुखर्कका स्थानीयले कुखुरा बोकेको गाडीमा लुटपाट गरेका छन् । प्राप्त विवरण अनुसार वडा नम्बर २ को चक्लेटी स्थित गंगा जमुना पोल्टी फार्मबाट कुखुरा लिएर धुलिखेल तर्फ आउँदै गरेको बोलेरोमा स्थानीयले लुटपाट गरेका हुन् ।

धुलिखेल–रविओवी–देविटार जाने कच्ची सकड खण्डको ऐसेलुखर्कमा स्थानीय युवा र महिलाले गाडी रोकेर ३८ वटा कुखुरा लुटेको बताइएको छ । लुटपाटमा संकलग्न भएको आरोपमा जिल्ला प्रहरी कार्यालय धुलिखेलले अनिल तामाङलाई पक्राउ गरेको छ । तामाङलाई ५ वटा कुखुरा सहित नियन्त्रणमा लिएर कानुन बमोजिम कारबाही सुरु गरिएको जिल्ला प्रहरी कार्यालय काभ्रेका प्रहरी नायव उपरीक्षक कुमार विक्रम थापाले जानकारी दिए ।

अघिल्लो दिन फाम सञ्चालक र स्थानीय केहि ब्यक्ति बीच सामान्य विवाद भएको थियो । त्यसैलाई आधार बनाएर स्थानीयले बाटो छेकेर लुटपाट गरेको भन्दै कुखुरा फार्म सञ्चालकले कारबाहीको लागि प्रहरी कार्यालयमा जाहेरी दिएका छन् । घटनाका मुख्य दोषिहरु भने फरार रहेको जनाइएको छ । ‘घटनामा संलग्नहरुको खोजी भइरहेको छ, डिएसपी थापाले भने ‘कति जना संलग्न छन् भन्ने बारेमा अध्ययन भरहेको छ ।’

फाम सञ्चालकले घटनामा संकलग्नहरुलाई छलफलका लागि बोलाउँदा समेत नआएपछि कारबाहीका लागि प्रहरीमा जाहेरी दिइएको बताइएको छ । स्थानीयहरुले बोलेरका चालकलाई समेत कुटपिट गर्ने धम्की दिएका थिए । तर हातपात भने नभएको प्रत्यक्षदर्शीहरुले बताएका छन् ।