धुलिखेल ३१ बैशाख  : काभ्रेको मण्डनदेउपुर नगरपालिकाले दुई वटा वडामा अपाङ्गता भएका व्यक्तिहरुको लागि हाइजिन किट वितर गरेको छ ।

नगरपालिकाले वडा नं ५ का ४१ जना र ६ का २७ जना लाई हाइजिन किट वितरण गरेको हो । नेपाल रेडक्रस सोसाइटी काभ्रे शाखा र रिमरेकको सहयोगमा आज किट वितरण गरिएको नगरपालिकाका प्रबक्ता डिल्लिप्रसाद आचार्यले बताए । नगरपालिकाको १२ वटै वडामा वितरण गर्न लागिएको किटमा हात धुने साबुन, प्याड, मञ्जन, ब्रस लगायतका सरसफाइका सामान राखिएको छ । नगरपालिकाले यसअघि वडा नं ७ मा पनि हाइजिन किट वितरण गरेको थियो । रातो कार्ड भएका ब्यक्तिहरुलाई मात्र किट वितरण गरिएको प्रवक्ता आचार्यले जनाएको छ ।

रातो कार्ड पाउने बाहेकका अपाङ्गता भएका ब्यक्तिलाई भने सरसफाईका सामान्य सामाग्री मात्र दिइएको छ । पालिकामा रातो कार्ड पाउने ७५ जना, निलो कार्ड १६५, पहेलो कार्ड ९० र सेतो कार्ड पाउने ५६ गरी जम्मा अपाङ्गता भएका ब्यक्तिको संख्या ३ सय ८६ छ ।