सिरहा २२ बैसाख : सिरहाको मिर्चैयामा राहत वितरण स्थलमा गोली चलेको छ । राहत वितरणमा विवाद हुँदा भीड तितरवितर पार्न प्रहरीले गोली चलाएको ईलाका प्रहरी कार्यालय मिर्चैयाका प्रहरी नायव उपरीक्षक सन्तु जैसवालले बताए ।

प्रहरी नायव उपरीक्षक जैसवालका अनुसार मिर्चैया नगरपालिका ७ फुलबरियामा राहत उपलब्ध गराउन नाम समावेश नगरेको भन्दै स्थानीयले वडा कार्यालयमा ढुंगामुढा गरेपछि झडप भएको थियो ।

झडपलाई नियन्त्रण गर्न वडा कार्यालय पुगेका प्रहरी टोलीले भीड तितरबितर गर्न ९ राउण्ड हवाई फायर गरेको प्रहरीले बताए । वडा कार्यालयले राहतमा विपन्न परिवारलाई छाडेको भन्दै दुई दिनदेखि वडा कार्यालय घेराउ गर्दै आएको थियो ।

घटनापश्चात वडा अध्यक्ष रामकुमार यादवले नाम छुटेका परिवारलाई राहत वितरण गरिने प्रतिबद्धता जनाएका थिए ।