पनौती : वित्तीय क्षेत्रमा काभ्रेको अग्रणी मध्यको एक सामुदायिक साकोसले पनौती नगरपालिकाद्वारा खडा गरिएको फुड बैंकलाई आइतबार राहत उपलब्ध गराएको छ ।

विश्वभर तिब्र गतिमा फैलिरहेको कोरोना भाईरस (कोभिड १९) का कारण नेपाल सरकार लगायत स्थानीय तहहरुले गरेको लक डाउनका कारण दैनिक ज्याला मजदुरी गरी छाक टार्नुपर्ने वर्गलाई लक्षित गरी राहत वितरण गर्ने उदेश्यले विभिन्न स्थानीय तहहरुले आ-आफ्नै स्थानबाट विभिन्न उपायहरु अपनाउदै राहत वितरण गरिरहेको अवस्थामा पनौती नगरपालिकाले खाद्यान्न सामाग्रीहरु राहत स्वरुप वितरण गर्न पालिकाले खाद्यान्न संकलन केन्द्र (फुड बैंक) को स्थापना गरी विभिन्न संघ संस्थाहरुलाई सहयोगको अपिल गरेकोमा सामुदायिक बचत तथा ऋण सहकारी संस्था लि. पनौतीले नगरपालिकाको उक्त फुड बैंकलाई खाने शुद्ध तोरीको तेल २९४ लिटर सहयोग गरिएको संस्थाका प्रमुख कार्यकारी अधिकृत मदन बस्नेतले बताए ।

सो सहयोग स्वरुप उपलब्ध गराइएको तेल संस्थाका अध्यक्ष प्रकाश बन्जाराले पनौती नगरपालिकाका प्रमुख भिम न्यौपानेलाई हस्तान्तरण गरेका हुन् । सामुदायिक वचत तथा ऋण सहकारी संस्था लि. ले आफ्नो सेवाकेन्द्रहरु रहेको स्थानीय तहहरुलाई खाद्यान्न वा नगद सहयोग गर्ने पनि अध्यक्ष बन्जाराले जानकारी दिए ।