धुलिखेल, २६ फागुनः जिल्ला ट्राफिक प्रहरी कार्यालय बनेपाले नियम उल्लंघन गर्ने ६४ वटा मोटरसाइकललाई कारबाही गरेको छ । ट्राफिक प्रहरी प्रमुख बिशाल तामाङका अनुसार जिल्लाको बनेपा, धुलिखेल, पनौती, पाँचखाल, भकुण्डे, मण्डनदेउपुर, दोलालघाट जस्ता मुख्य–मुख्य बजार क्षेत्रमा मोटरसाइकललाई कारबाही गरिएको थियो ।

६४ वटा कारबाहीबाट ५५ हजार रुपैयाँ राजस्व संकलन भएको छ । मादक पदार्थ सेवन गरी सवारी चलाउने, हेल्मेट नलगाउने, बढी यात्रु बोक्ने र तीब्र गतिमा चलाउने मोटरसाइकलाई कारबाही गरिएको ट्राफिक प्रहरी प्रमुख तामाङले बताए । ‘हामीले दुई पाङ्ग्रे सवारी साधनलाई मात्रै लक्षित गरेर कारबाही अभियान चलाएका थियौ, उनले भने अरनिको र बीपीमा गरिएको कारबाहीबाट एकै दिन ५५ हजार रुपैयाँ राजस्व संकलन भएको हो ।’

काभ्रेमा यो वर्षको होली निकै सुनसान रह्यो । जिल्ला प्रहरी कार्यालयले धुलिखेलले धेरै जमघट हुने, इच्छा विपरित रंग दल्ने, लोला हाल्ने र पानी छ्याप्ने सम्भावित क्षेत्रमा दिनभर गस्ती गरेको थियो । संवेदशील मानिएका मुख्य–मुख्य बजार क्षेत्रमा थप प्रहरी परिचालन गरिएको काभ्रेका प्रहरी प्रमुख रवि कुमार पौडेलले बताए । यो वर्ष होलीको दिन कुनै पनि अप्रिय घटना नभएको प्रमुख पौडेलले बताए ।