धुलिखेल, २३ फागुनः नेपाल रेडक्रस सोसाइटी काभ्रे शाखाको निर्वाचन गर्न बाटो खुल्ला भएको छ । यसअघि माघ २५ गते तय गरिएको शाखाको निर्वाचन स्थागित भएको थियो । शाखामा भ्रष्टाचार भएको उजुरी अख्तियार दुरुपयोग अनुसन्धान आयोगमा परेको भन्दै जिल्ला प्रशासन कार्यालय धुलिखेलले तत्काललाई निर्वाचन प्रक्रिया स्थगित गर्न निर्देशन दिएको थियो ।

तर बिहीबार पुनः प्रशासन कार्यालयले निर्वाचन प्रक्रिया अघि बढाउन पत्र काटेको हो । सहायक प्रमुख जिल्ला अधिकारी लक्ष्मीदेवी होमागाई (खतिवडा) ले गत माघ २४ गते काटेको पत्रको स्मरण गराउँदैँ निर्वाचन प्रक्रिया अघि बढाउन पत्र मार्फत भनेकी छन् ।

प्रशासनको पत्र आएपछि पनि निर्वाचन प्रक्रिया भने अन्योलमा परेको छ । निर्वाचन अधिकृतले निर्वाचन प्रक्रिया अघि बढाउन नमानेको स्रोतले बताएको छ । काँग्रेस निकटका निर्वाचन अधिकृत राजेन्द्रमान ताल्चाभडेलले निर्वाचन प्रक्रिया अघि बढाउन नमानेका हुन् । ‘ताल्चाभडेले आफु यो विषयमा केहि नबोल्ने र जे लेखे पनि केहि फरक नपर्ने टेलिफोन सम्पर्कमा प्रतिक्रिया दिए ।’ ताल्चाभडेललाई निर्वाचन अधिकृतका रुपमा रेडक्रसको केन्द्रले तोकेर पठाएको हो । तर काँग्रेस निकटका पदाधिकारी हार्ने छाट देखिएपछि उनले चुनाव गराउन नसक्ने बहाना बनाएको बताइएको छ ।

रेडक्रसको चुनावमा कम्युनिष्ट र काँग्रेस प्यानल बनाएर होमिएका छन् । कम्युनिष्ट तर्फका वर्तमान सभापति रघुबर चौ प्रधानकै नेतृत्वमा १७ जना उम्मेवार घोषणा गरेर चुनानवी मैदानमा होमिएको छ ।

नेपाल रेडक्रस सोसाइटी काभ्रे शाखाका पदाधिकारीहरुले खाएको तलबमा १ प्रतिशत मात्र कर तिरेर राजस्व छली गरेकोले छानबिन गरी तत्काल कर असुली गर्न र दोहोरो तलब भत्ता खाएर भ्रष्टाचार गरेकाले अनुसन्धान गरी कारबाही गर्न भन्दै अख्तियार दुरुपयोग अनुसन्धान आयोगमा १३ पुसमा उजुरी दर्ता भएको थियो ।