धुलिखेल, १८ फागुनः धुलिखेल नगरपालिकाको वडा नम्बर ८ मा भुकम्पपछि सरकारी अनुदानमा घर बनाइसक्ने लाभग्राहिलाई प्रमाणपत्र वितरण सुरु गरिएको छ । वडाध्यक्ष निरञ्जन जंगमका अनुसार आइतबारबाट प्रमाणपत्र वितरण सुरु भएको हो ।

वडा नम्बर ८ मा ४ सय ४७ जना भुकम्पप्रभावितले तेस्रो किस्ता बापतको रकम लिइसकेका छन् । ७ सय ७५ लाभग्राहि छनौट भएका मध्ये ७ सय ३७ जनासँग घर निर्माणका लागि राष्ट्रिय पुनःनिर्माण प्राधिकरणले सम्झौता गरेको थियो ।

वडाध्यक्ष जंगमका अनुसार ५ सय ५१ जनाले दोस्रो किस्ता बापतको रकम बुझिलिइसकेका छन् । घर बनाइसकेका लाभग्राहिले वडा कार्यालयबाट प्रमाणपत्र लिनसक्ने वडाध्यक्ष जंगमले बताए । ‘यो एउटा सरकारी प्रमाणपत्र हो, सबैले लिएर राख्दा राम्रो हुन्छ, उनले भने ‘वडा कार्यालयबाटै यो प्रमाणपत्र उपलब्ध गराउने गरी ब्यवस्था मिलाइएको छ ।’