धुलिखेल १५ फागुन : नेपाल कम्युनिस्ट पार्टी (माले) का महासचिव तथा पूर्वउपप्रधानमन्त्री चन्द्र प्रकाश (सीपी) मैनाली चढेको गाडी महोत्तरी र सिन्धुलीको सीमा नजिक बर्दीबासमा दुर्घटनामा परेको छ । दुर्घटनामा परी महासचिव मैनाली गम्भीर घाइते भएका छन् । परिवार श्रोतका अनुसार महासचिव मैनाली होसमा रहेको भए पनि उनको टाउको र गोडामा गम्भीर चोट लागेको छ । बर्दीबासमा उपचार हुन नसकेपछि मैनालीको थप उपचारको लागि नेपाल आर्मीको हेलिकोप्टरबाट भरखरै काठमाडौं ल्याइएको छ । मैनालीको उपचार ग्रान्डी हस्पिटल सामाखुसीमा गरिने नेकपा (माले) पार्टी कार्यालय श्रोतले जनाएको छ ।

झापाबाट महासचिव मैनाली, उनका छोरा, बुहारी, नाति र चालकसहित काठमाडौंतर्फ आउँदै गरेका थिए । बा ७ च २१२० नम्बरको कार बर्दिबासस्थित वीपी राजमार्गको कालापानीमा विपरीत दिशाबाट आएको ना ४ च ७६८० नम्बरको भ्यानसँग ठोक्किएको थियो । गाडीको अगाडि सिटमा रहेका मैनालीको दायाँ गोडा दुई ठाउँमा भाँचिएको छ । चालक रामप्रसाद पौडेलको टाउकोमा चोट लागेको छ । पछाडी सिटमा रहेकी बुहारी पूजा ढुंगाना मैलानीको दुईवटै गोडा भाँच्चिएको परिवारले बताएको छ । दुर्घटनामा परेका सबैको काठमाडौमा उपचार थालिएको छ ।

महासचिव मैनाली कान्छो भाइ मीनप्रकाश मैनालीको छोरीको विवाहमा सरिक भई फर्कनेक्रममा दुर्घटनामा परेका हुन् । दुर्घटनामा परी मैनालीका छोरा ३० बर्षीय सरोज मैनाली, ५ बर्षीय नाति एन मैनाली पनि घाइते भएका छन् ।