धुलिखेल, ४ फागुनः सिन्धुपाल्चोक जिल्लाको लिसंखु-पाखर गाउँपालिकाले पशुपालक किसानका लागि सहुलियत दरमा ऋण उपलब्ध गराउने भएको छ । पालिकाले एक सुचना निकालेर ब्यवसायिक पशुपन्छी पालन गर्ने किसानहरुसँग निवेदन माग गरेको छ । पालिकाले किसानलाई १ प्रतिशत ब्याजदर कायम गरेर ऋण दिन लागेको हो । पशुपालन गर्ने ब्यक्ति, फर्म, समूह र कम्पनीले सहुलियत दरको ऋण पाउने प्रमुख प्रशासकीय अधिकृत पूर्णप्रसाद दुलालले जानकारी दिए ।

पालिकाले स्थापना गरेको ब्यवसायिक पशुपन्छी विकास कोषमा जम्मा भएको रकम सहुलियतपूर्ण ऋण स्वरुप किसानलाई दिन लागेको हो । ‘हामीले किसानहरुको हितका लागि भनेर एउटा कोष खडा गरेका थियौँ, प्रमुख प्रशासकीय अधिकृत दुलालले भने ‘त्यहि कोषमा जम्मा भएको रकम सहुलियतपूर्ण ऋणका रुपमा पशुपालक किसान दाजुभाई दिदीबहिनीले पाउनुहुनेछ ।’

किसानले ऋण सहकारी मार्फत पाउनेछन् । त्यसका पालिकाले ४ वटा सहकारी छनौट गरेर सम्झौता समेत गरिरकेको छ । पालिकाभित्र ७ ओटा वडा रहेका छन् । पालिकाले एक महिनाभित्र निवदेन दिन पनि भनेको छ । ‘यो ऋण बापतको रकम सहकारी मार्फत किसानहरुले पाउने हो, सहकारीसँग हामीले सम्झौता गरिसकेका छौँ, दुलालले भने ‘सहकारीले हाम्रो नियम अनुसार ऋण प्रवाह गर्नुपर्नेछ, त्यो सम्झौतामा स्पष्टसँग उल्लेख गरिएको छ, अतिरिक्त शुल्कको नाम कुनै पनि किसानसँग तोके भन्दा बढी रकम अशुले कारबाहि हुनेछ, यो पशुपाल्ने किसान प्रोत्सान कार्यक्रम हो ।’