धुलिखेल, २२ पुस काभ्रेको पनौती, नमोबुद्ध र बेथानचोक गाउँपालिकामा रहेका क्रसर उद्योग मापदण्ड विपरित चलिरहेको पाइएको छ । जिल्ला अनुगमन समिति काभ्रेले पनौतीको धनेश्वरी क्रसर उद्योग बन्द गर्न निर्देशन दिएको छ ।

पनौती नगरपालिका वडा नम्बर ५ खड्पुमा रहेको धनेश्वरी क्रसर उद्योगका सञ्चालक तीन दिनभित्र बन्द गर्न समितिले निर्देशन दिएको हो । अनुगमनका क्रममा अवैधानिक र मापदण्डविपरीत सञ्चालन भइरहेको पाएपछि उद्योग सञ्चालक शेषनारायण सुवाललाई बन्द निर्देशन दिएको जिल्ला समन्वय समितिका प्रमुख उद्धव केसीले जानकारी दिए ।

भिडियोमा हेर्नुस 

पुण्यमाता खोला र पनौती सडकसँग जोडिएको २०५२ देखि सञ्चालनमा आएको हो । अनुगमन समितिले यस्तै नमोबुद्ध नगरपालिका वडा नम्बर ४ मा २०६१ देखि सञ्चालनमा रहेको पशुपति रोडा–ढुङ्गा उद्योग दर्ता बिना नै सञ्चालन भइरहेको पाइएको छ ।

त्यसैगरी रोशी गाउँपालिका वडा नम्बर २ मा २०६५ देखि सञ्चालन भइरहेको ओम सत्यसाई स्टोन क्रसर उद्योग प्रालि पनि कतै दर्ता भएको छैन । नमोबुद्ध नपा वडा नम्बर ६ मा रहेको ब्लुसाइमन रोडा–ढुङ्गा उद्योग प्रालि र बेथानचोक गाउँपालिका वडा नम्बर ४ मा २०६६ देखि सञ्चालन भइरहेको एसएस रोडा–ढुङ्गा उद्योग पनि दर्ता नगरी सञ्चालन हुदैँ आएको पाइएको छ ।