काठमाडौं, १५ असोज । यौन दुर्व्यवहारको आरोपित सभामुख कृष्णबहादुर महराले सभामुख पदबाट उप–सभामुखसामु दिएको राजीनामाको सूचना संसद सचिवालयमा आज टाँसिएको छ । उपसभामुखको निर्देशनअनुसार प्रतिनिधिसभा नियमावलीको नियम २११ को उपनियम २ अनुसार सूचना टाँसिएको संसद सचिवालयले जनाएको छ ।

महराले मंगलबार उपसभामुख शिवमाया तुम्बाहाम्फेसमक्ष राजीनामा दिएका थिए । उनले दिएको राजीनामा पत्रमा ‘छानविन नहुँदासम्मका लागि’ राजीनामा दिएको उल्लेख गरिएको छ । तर संसद सचिवालयको सूचनामा यसबारे भने केही उल्लेख गरिएको छैन । सूचनाको आधारमा सभामुखको पद रिक्त भएको छ भने सभामुख पदका लागि नयाँ निर्वाचनको बाटो खुल्ला भएको छ । तर राजीनामा दिएका सभामुख महराको निजी सचिवालयले भने छानविन प्रक्रिया पूरा भइसकेपछि उनी पुनः जिम्मेवारीमा फर्कने दावी गरेको थियो ।