धुलिखेल १२ असोजः काभ्रेको धुलिखेलबाट प्रसारण भइरहेको रेडियो नमोबुद्ध एफएम १०६.७ मेगाहर्ज आइतबार देखि चौधौँ वर्षमा प्रवेश गरेको छ ।

२०६३ साल असोज १२ गते स्थापना भएको रेडियो काभ्रे लगायत आसपासका जिल्लाहरुकै पहिलो सामुदायिक रेडियो हो ।

चौधौँ वर्ष प्रवेशको उपलक्ष्यमा रेडियोले विशेष कार्यक्रम आयोजना गरी आफ्नो स्रोता, विज्ञापन दाता, संरक्षक र आजीवन सदस्य लगायतलाई धन्यवाद दिएको छ ।

धुलिखेलमा भएको कार्यक्रममा रेडियोका अध्यक्ष भक्त स्याङतानले समुदायको हितका लागि रेडियोले अझै धेरै काम गर्न आवश्यक रहेको बताए । त्यस्तै पूर्वअध्यक्ष जगतमान दोङले रेडियो सुनिने ठाउँमा सूचना प्रवाह र नसुनिने ठाउँमा समुदाय केन्द्रित कार्यक्रम गर्नु पर्नेमा जोड दिए ।

अन्तर्राष्ट्रिय तामाङ परिषद्का उपाध्यक्ष कुमार दोङले स्थानीय लोपउन्मुख भेषभूषा, रितीरिवाज, धर्म, संस्कृतिको संरक्षण, जर्गे र प्रचारप्रसारमा सामुदायिक रेडियोको भूमिका महत्व पूर्ण रहेको बताए ।

गैरसरकारी संस्था महासंघ काभ्रे शाखाका अध्यक्ष टोम सापकोटाले २०७२ बैशाखको भूकम्प, बाढी, पहिरो जस्ता विपदका बेला रेडियो नमोबुद्धले खेलेको भूमिकाको विशेष रहेको औल्याए ।

युवा ब्यवसायी भेषराज शाहले विभिन्न अप्ठ्यारो परिस्थितिका बीच पनि रेडियो नमोबुद्धले समुदायको हितका लागि काम गरेको उल्लेख गर्दै अझ यसलाई समय सापेक्षा बनाउँदै लैजानुपर्नेमा जोड दिए ।

रेडियोे नमोबुद्धका स्टेसन म्यानेजर हिरामान लामाले रेडियोले छिट्टै आफ्नै भौतिक पूर्वाधार निर्माण गर्ने बताए । उनले समाज सुहाउँदो विषयवस्तु समाचार, कार्यक्रम र पिएसए मार्फत रेडियोले प्रसारण गरिरहेको भन्दै आगामी दिनमा थप प्रभावकारी बनाउने बताए ।

रेडियोले अहिले तामाङ, दनुवार, शेर्पा, जिरेल, ह्योल्मो लगायत जातजातिको भाषाका कार्यक्रमहरु प्रसारण गर्दै आइरहेको छ ।