धुलिखेल, ३१ भदौ: मौसममा खराबी आएपछि आज मंगलबार काठमाडौं स्थित त्रिवुभवन अन्तर्राष्ट्रिय विमानस्थल आकस्मिक रुपमा अवरुद्ध भएको छ । विमानस्थल अवरुद्ध भएपछि काठमाडौंका लागि उडेका हेलिकोप्टरहरु काभ्रेमा आकस्मिक रुपमा अवतरण गराइएको छ ।

काभ्रेको पाँचखालमा लुक्लाबाट काठमाण्डौका लागि उडेको हेलिकप्टर आकस्मिक अवतरण गराइएको हो । मंगलबार लुक्लाबाट काठमाण्डुका लागि उडेका मनाङ्ग, सिम्रिक र कैलाश एयरका ४ वटा हेलिकप्टर पाँचखाल नगरपालिका वडा नम्बर २ जोरपाटीमा ३ र होक्सेमा १ वटा हेलिकप्टर आकस्मिक अवतरण गरेको जिल्ला प्रहरी कार्यालय काभ्रेले जनाएको छ ।

खराब मौसमका कारण लुक्लाबाट पर्यटक लिएर आएको हेलिकप्टर आकस्मिक अवरण गरिएको काभ्रेका एसपी जयराज सापकोटाले पुष्टि गरे । उनका अनुसार हेलिकप्टरका सबै यात्रु शकुशल छन् । मौसममा सुधार आएपछि मात्रै हेलिकप्टरहरुले गतन्ब्यका लागि उडान भर्नेछन् । प्रत्येक हेलिकप्टरमा ४ देखि ५ जना यात्रु रहेको एसपी सापकोटाले बताए ।

यसैबीच सिन्धुलीको नेपालथोकमा समेत लुक्लाबाट आएको हेलिकप्टर आकस्मिक अवरण गराइएको छ । आकस्मिक अवरण भएका तीन मध्ये २ वटा हेलिकप्टर काठमाण्डौ उडिसकेको जिल्ला प्रहरी कार्यालय सिन्धुलीले जनाएको छ ।