वीरगञ्ज पर्सा, २१ भदौ : वीरगञ्ज महानगरपालिका–२ मा हिजो शुक्रबार विद्यालय जाँदै गरेकी मुस्कान खातुनमाथि एसिड आक्रमण गर्ने मजिद मिया पनि पक्राउ परेका छन्। यसअघि प्रहरीले दुई अभियुक्तमध्ये सम्साद आलमलाई घटना भएलगत्तै पक्राउ गरेको थियो ।

सहयोगी सम्साद आलमसँग मिलेर मजिदले तेजाब प्रहार गरेको खुलेको पर्साका प्रहरी उपरीक्षक सोमेन्द्र सिंह राठौरले बताए। शुक्रबार बिहान त्रिभुवन हनुमान माविमा कक्षा ९ मा अध्ययनरत मुस्कानमाथि साथीसँग विद्यालय जाँदै गर्दा वीरगन्ज–४ बिर्तामा रहेको गणेशमानोक नजिक एसिड आक्रमण भएको थियो। एसिडले मुस्कानको अनुहार, छाती र हात तथा कपडाहरु जलेको छ। उनको काठमाडौंमा उपचार भइरहेको छ।

खातुनमाथि एसिड प्रहार प्रेम अस्वीकार गर्दा भएको अशांका गरिएको छ । कलिलो उमेरमा हुने प्रेम आकर्षण र त्यसलाई अस्वीकार गर्दा युवतिहरुमाथि एसिड प्रहार हुने गरेको छ । यसअघि पनि काठमाडौंमा २०७१ फागुन १० गते यस्तै प्रकृतिको घटना घटाएका थिए । यसका अलावा परिवारमा घटपट हुँदा पनि एसिड प्रहारका घटनाहरु हुने गरेको देखिएको छ । घटनाहरु प्रायः किशोरीहरुमाथि नै हुने गरेको छ ।