काठमाडौं, १ भदौ । पत्रकार शालिकराम पुडासैनी आत्महत्या प्रकरणमा उनको परिवारले आइतबार किटानी जाहेरी दिएको छ । यसअघि उनलाई आत्महत्या दुरुत्साहन गराउने आरोपमा पत्रकार रवी लामिछाने लगायत ३ जनालाई प्रहरीले नियन्त्रणमा लिएको थियो । चितवनमा बास बसेको होटलमा झुण्डिएको अवस्थमा मृत फेला परेका पुडासैनीका परिवारले काठमाडौं प्रहरी परिसर, टेकुमार्फत जिल्ला प्रहरी कार्यालय, चितवनमा किटानी जाहेरी दिएका हुन् ।

देशमा निरन्तर हुँदै आएका वेथितीका विरुद्धमा आवाज दिएर र समस्यामा परेकालाई राज्य संयन्त्रकै उपयोग गरी सघाएर लोकप्रियता कमाएका सञ्चारकर्मी रवी लामिछानेको समर्थनमा यतिबेला हज्जारौंले प्रदर्शन गर्दै आएका छन् । उनीसँगै अर्का आरोपी युवराज कँडेल र नर्स अस्मिता कार्की प्रहरी नियन्त्रण छन् । पुडासैनी आत्महत्या प्रकरणमा प्रहरीले अदालतबाट म्याद थप गरी उनीहरुमाथि अनुसन्धान गरिरहेको छ ।