काठमाण्डौ,१३ माघ: काभ्रेको तेमाल गाउँपालिकाका बालबालिकालाई झोला वितरण गरिएको छ । गाउँपालिकाको वडा नम्बर ६ यङसिलमा रहेको कालिदेवी आधारभूत विद्यालयका बालबालिकालाई झोला वितरण गरिएको हो ।

हुम्लाका थिन्ले दोर्जे लामाको आर्थिक सहयोगमा ओम नेपालले ४५ जना बालबालिकालाई झोला वितरण गरेको हो । झोला वितरण कार्यक्रममा बोल्दै गैरसरकारी संस्था महासंघका केन्द्रिय अध्यक्ष जीतराम लामाले सरकार र सामाजिक संघसंस्थाहरु बीच विकास निर्माण, सचेतना लगायतका बिषयमा प्राप्त ज्ञान साटासाटले मात्रै मुलुक समृद्धिको गन्तब्यमा पुग्ने बताए । “एकले सिकेको सिप अर्कोलाई हस्तान्तरण गर्दै भयो भने मात्रै दिगो हुन्छ, उनले भने “सामाजिक रुपान्तरण एकै क्षेत्रले गरेर मात्रै हुदैँन, सबैको हात्तेमालो हुनुपर्छ ।”

कार्यक्रममा बोल्दै सामाजिक अभियान्त मिना श्रेष्ठले सामाजिक संघसंस्थाहरुको सहयोग दुर्गम र विपन्न क्षेत्रमा पुगेको भन्दै अझ यसको दायरा फराकिलो पार्नु पर्नेमा जोड दिइन् । झोलासँगै कापी, कलम, इरेजर लगायतका शैक्षिक सामग्री पनि वितरण गरिएको संस्थाका अध्यक्ष खुसराज लामाले जानकारी दिए ।

नयाँ झोला पाएपछि बालबालिकाहरु खुशी भएका छन् । विद्यालयका प्रधानाध्यापक सार्कीमान तामाङले बालबालिकाहरुको पठनपाठनमा थप हौसला मिल्ने बताए ।