काठमाडौँ, २५ पुस : टोखा नगरपालिकाले महिला स्वास्थ्य स्वयंसेविकालाई मासिक रु ५०० प्रोत्साहन भत्ता दिने गरेको छ । स्वास्थ्य स्वयंसेविकाको कामको उच्च मूल्याङ्कन गर्दै काम गर्ने हौसला प्रदान गर्न नगरपालिकाले प्रोत्साहन भत्ता दिने गरेको नगर उपप्रमुख ज्ञानमाया डङ्गोलले बताउनुभयो । “स्वयंसेविकाले काम गरेबापत पारिश्रमिक पाउँछन्, अझ बढी समाजमा राम्रो काम गर्न जागरुक होस् भन्ने उद्देश्यले प्रोत्साहन भत्ता दिने व्यवस्था गरिएको हो”, उहाँले भन्नुभयो ।

उनीहरुले सुरक्षित प्रसूति सेवा, बालबालिकालाई खोप, गर्भवतीलाई आइरन चक्की वितरण, बालबालिकालाई भिटामिन खुवाउनेलगायत स्वास्थ्यका आधारभूत विषयमा सहयोग गर्दै आइरहेका छन् । यस वर्ष स्वास्थ्य शाखाका लागि नगरपालिकाले रु ५० लाख बजेट छुट्याएको छ । नगरपालिकाको ११ वटै वडामा ९९ जना स्वास्थ्य स्वयंसेविका कार्यरत छन् ।
-रासस