पोखरा, २२ मङ्सिर: राष्ट्रियसभाका अध्यक्ष गणेशप्रसाद तिमिल्सिनाले कारागारलाई सुधार गृहका रुपमा विकास गरिनुपर्ने बताउनुभएको छ । पोखरास्थित कास्की जिल्ला कारागारको आज निरीक्षणपश्चात् सञ्चारकर्मीसँग सङ्क्षिप्तरुपमा कुरा गर्दै उहाँले कैदीबन्दीलाई आफूले गरेको अपराधजन्य कार्यप्रति पश्चातापको महसुश गर्ने गरी परिवर्तन गराउनुपर्ने बताउनुभयो ।

कैद समय भुक्तान भएपछि सकारात्मक सोचका साथ सामाजिक जीवनयापन गर्ने वातावरण निर्माण हुनु आवश्यक रहेकामा उहाँको जोड छ । कारागारको भौतिक पूर्वाधार तथा कैदीबन्दीको अवस्थाबारे जानकारी लिनु हुँदै उहाँले बन्दीले उठाएका जायज मागप्रति प्रदेश एवम् सङ्घीय सरकारको ध्यानाकर्षण गराउने प्रतिबद्धता व्यक्त गर्नुभयो ।

विभिन्न तीन वटा ब्लकमा ५३ महिलासहित कूल ७५८ जना कैदीबन्दी रहेको कास्की कारागारका निमित्त जेलर विष्णु सुवेदीले जानकारी गराउनुभयो । कारागारको क्षमता भने तीन सयजना राख्न सक्ने रहेको जनाइएको छ । उहाँका अनुसार कास्की कारागारमा कैदीबन्दीको सुविधाका लागि प्रत्येक ब्लकमा किनारा, मासु, सैलुन लगायतका व्यापारिक कक्ष राखिएको छ भने स्वआयआर्जनका लागि पुरुषले मोहडा र महिलाले हस्त निर्मित घरेलु सामान बनाउने गरेका छन् ।
-रासस