रत्ननगर, १ भदौ :नेपाल कम्युनिष्ट पार्टी (नेकपा)का नेता जनार्दन शर्माले श्रममा आधारित कृषि शिक्षाको विकास जरुरी रहेको बताउनुभएको छ । कृषि तथा वन विज्ञान विश्वविद्यालय चितवनको अखिल (क्रान्तिकारी) एकाइ समितिद्वारा आज भरतपुरमा आयोजित विद्यार्थी बिदाइ कार्यक्रममा उहाँले भन्नुभयो, “कृषि शिक्षालाई श्रम र उद्योगसँग जोडेर अघि बढ्नुपर्दछ ।”

पूर्वगृहमन्त्रीसमेत रहनुभएका नेता शर्माले देशको विकासका लागि प्राविधिक र व्यावसायिक शिक्षाको आवश्यकता रहेको उल्लेख गर्दै कृषि विश्वविद्यालयले निजी कलेजलाई सम्बन्धन दिने नभई आफैँले कृषि शिक्षा र अनुसन्धानलाई अगाडि बढाउनुपर्नेमा जोड दिनुभयो । यसका लागि आवश्यक जग्गा सरकारले व्यवस्थापन गर्ने बताउँदै उहाँले हरेक प्रदेशमा कृषि शिक्षा जरुरी रहेको धारणा व्यक्त गर्नुभयो ।