काठमाडौं । नेपाली बजारमा सुनको मूल्य फेरि तीन लाख रुपैयाँभन्दा माथि पुगेको छ। बिहीबार सुनको भाउ प्रतितोला ७ हजार ६ सय रुपैयाँले बढेको हो।

नेपाल सुनचाँदी व्यवसायी महासंघका अनुसार बिहीबार छापावाल सुन प्रतितोला ३ लाख ४ हजार ९ सय रुपैयाँमा कारोबार भइरहेको छ। बुधबार भने सुन प्रतितोला २ लाख ९७ हजार ३ सय रुपैयाँमा कारोबार भएको थियो। यसअघि बुधबार सुनको मूल्य प्रतितोला ८ हजार ८ सय रुपैयाँले घटेको थियो। त्यसको भोलिपल्टै पुनः ठूलो वृद्धि भएपछि सुनको मूल्य तीन लाख रुपैयाँको सीमाभन्दा माथि उक्लिएको हो।

यस्तै, चाँदीको मूल्यमा पनि वृद्धि भएको छ। बुधबार प्रतितोला ४ हजार ५ सय ८० रुपैयाँमा कारोबार भएको चाँदी बिहीबार ४ हजार ७ सय २५ रुपैयाँ पुगेको महासंघले जनाएको छ। अन्तर्राष्ट्रिय बजारमा पनि सुनको मूल्य उच्च स्तरमा कारोबार भइरहेको छ। बिहीबार अन्तर्राष्ट्रिय बजारमा सुन प्रतिऔंस ४ हजार ४ सय ३० अमेरिकी डलरमा कारोबार भइरहेको छ। सुनको मूल्यमा देखिएको पछिल्लो उतारचढावले नेपाली बजारमा पनि दैनिक कारोबार मूल्यमा ठूलो प्रभाव पारेको छ।