बझाङ । जयपृथ्वी नगरपालिका वडा नम्बर ७ मा राजनीतिक हलचल पैदा भएको छ। नेकपा (माओवादी पृष्ठभूमि) का वडा कमिटी अध्यक्ष कमल खत्रीले पार्टी परित्याग गर्दै रास्वपामा प्रवेश गरेका छन्।

खत्रीलाई रास्वपाका स्थानीय नेताहरूले औपचारिक रूपमा स्वागत गर्दै नगर कमिटी सचिव पदमा जिम्मेवारी दिएका छन्। पार्टी प्रवेशपछि संगठनभित्र नयाँ समीकरण बनेको स्थानीय तहमा चर्चा छ।

उक्त वडाबाटै नेकपाका तर्फबाट वडा अध्यक्ष निर्वाचित भएका कारण यो प्रवेशलाई राजनीतिक रूपमा महत्वपूर्ण घटनाका रूपमा हेरिएको छ। स्थानीय नेताहरूका अनुसार पार्टीभित्र नेतृत्व शैली र कार्यसम्पादनप्रति असन्तुष्टि बढ्दै गएको थियो, जसकै कारण संगठन कमजोर हुँदै गएको दाबी गरिएको छ।

तर आलोचक पक्षले भने आफ्नै पार्टीका वडा कमिटी अध्यक्षलाई समेत टिकाउन नसक्ने नेतृत्वले विकास र जनअपेक्षा कसरी पूरा गर्न सक्छ भन्ने प्रश्न उठाएका छन्।