काठमाडौँ । भारतीय जनता पार्टी (भाजपा)को निमन्त्रणामा भारत भ्रमणमा रहेका रास्वपा सभापति रवि लामिछाने ले आज नयाँ दिल्लीमा भाजपा नेतृत्वसँग उच्चस्तरीय भेटवार्ता गर्ने भएका छन्।

कार्यक्रमअनुसार लामिछानेले नयाँ दिल्लीस्थित भाजपा मुख्यालयमा भाजपा अध्यक्ष नीतिन नवीन लगायतका नेताहरूसँग भेट गर्नेछन्। रास्वपाको सचिवालयका अनुसार भेटवार्तामा नेपाल–भारत सम्बन्ध, लोकतान्त्रिक अभ्यास, राजनीतिक अनुभव आदानप्रदान तथा दुई देशका राजनीतिक शक्तिबीचको सम्बन्ध सुदृढीकरणका विषयमा छलफल हुने अपेक्षा गरिएको छ।

भारतीय जनता पार्टीको औपचारिक निमन्त्रणामा भएको यो भ्रमणलाई राजनीतिक तथा कूटनीतिक दृष्टिले अर्थपूर्ण रूपमा हेरिएको छ। भ्रमणका क्रममा लामिछानेले विभिन्न राजनीतिक तथा सार्वजनिक महत्त्वका व्यक्तिहरूसँग समेत भेटघाट गर्ने कार्यक्रम रहेको जनाइएको छ।

रास्वपाले यस भ्रमणलाई अन्तरपार्टी सम्बन्ध विस्तार, अनुभव आदानप्रदान तथा क्षेत्रीय सहकार्यका दृष्टिले महत्त्वपूर्ण अवसरका रूपमा लिएको जनाएको छ।