काठमाडाैँ। नेकपा (एमाले) का महासचिव तथा दाङ क्षेत्र नम्बर २ का प्रतिनिधिसभा सदस्य उम्मेदवार शंकर पोखरेलले पार्टीको झण्डा र चुनाव चिन्ह जलाइएको घटनाप्रति कडा आपत्ति जनाएका छन्।

उनले उक्त घटनालाई “अराजक, आपराधिक र लोकतन्त्रविरोधी गतिविधि” भन्दै संलग्न तत्वहरूलाई निर्वाचनमार्फत जनताले अस्वीकार गर्ने चेतावनी दिएका छन्। सामाजिक सञ्जाल फेसबुकमार्फत प्रतिक्रिया दिँदै पोखरेलले स्पष्ट शब्दमा भनेका छन्, “अराजकता र उदण्डता कुनै नयापन होइनन्, ती अपराध हुन्। झण्डा जलाएर अरूको आस्थामा चोट पुर्‍याउनेहरू सम्मानका हकदार हुन सक्दैनन्। यस्ता तत्वहरूलाई जनताले निर्वाचनमार्फत अस्वीकार गर्नेछन्।”

दाङ क्षेत्र नम्बर २ मा चुनावी प्रतिस्पर्धा तीव्र भइरहेका बेला एमालेको झण्डा तथा चुनाव चिन्ह जलाइएको घटना सार्वजनिक भएपछि सुरक्षाकर्मीले घटनाको छानबिन अघि बढाएको जनाइएको छ।

महासचिव पोखरेलले यसलाई केवल पार्टीमाथिको आक्रमण नभई लोकतान्त्रिक अभ्यासमाथिको प्रहारका रूपमा व्याख्या गरेका छन्। उनले राजनीतिक असहमति व्यक्त गर्ने वैधानिक र शान्तिपूर्ण माध्यम हुँदाहुँदै प्रतीकात्मक हिंसाको बाटो रोज्नु “अलोकतान्त्रिक संस्कार” भएको टिप्पणी गरेका छन्।

उनले आफ्ना कार्यकर्ता र समर्थकलाई संयमित रहन आग्रह गर्दै भनेका छन् कि लोकतन्त्रमा अन्तिम फैसला मतपेटिकाबाट हुन्छ, सडकबाट होइन। “हामी आक्रोशमा होइन, जनताको मतबाट उत्तर दिन्छौँ,” उनले उल्लेख गरेका छन्।

चुनावी प्रतिस्पर्धा चर्किँदै जाँदा यस्ता घटनाले राजनीतिक वातावरण थप संवेदनशील बनेको विश्लेषण गरिएको छ। अन्य दल र नागरिक समाजका प्रतिनिधिहरूले पनि घटनाको निष्पक्ष छानबिन र दोषीमाथि कारबाही हुनुपर्ने धारणा सार्वजनिक गर्न थालेका छन्।

आगामी निर्वाचनको पूर्वसन्ध्यामा भएको यस घटनाले दाङको राजनीतिक माहोल तातेको छ। तर महासचिव पोखरेलले स्पष्ट संकेत दिएका छन् । अराजक गतिविधिको अन्तिम उत्तर जनताले मतदानमार्फत दिनेछन्। लोकतान्त्रिक प्रक्रियामै विश्वास राख्दै उनले शान्तिपूर्ण प्रतिस्पर्धाको आह्वान गरेका छन्।