काठमाडौँ । पोखराको लिचीबारी भ्रष्टाचार प्रकरणमा पूर्व सङ्घीय मामिला तथा सामान्य प्रशासन मन्त्री राजकुमार गुप्तालाई थुनामा पठाउने आदेश विशेष अदालतले बुधबार जारी गरेको छ।

विशेष अदालतका न्यायाधीश सुदर्शनदेव भट्ट, डिल्लीरत्न श्रेष्ठ र विदुर कोइरालाको इजलासले यो फैसला गरेको हो।मन्त्री गुप्तामाथि कास्की मालपोत कार्यालयका प्रमुखको सरुवा रोक्ने र भूमि आयोगमा सदस्य बनाइदिने सन्दर्भमा घरजग्गा व्यवसायीबाट ५३ लाख रुपैयाँ घुस लिएको आरोप छ। अख्तियार दुरुपयोग अनुसन्धान आयोगले उनलाई र पूर्वमन्त्री रञ्जिता श्रेष्ठलाई आपसी मिलेमतोमा पदको दुरुपयोग गरी २५ लाख रुपैयाँ घुस लिएको अभियोगमा मुद्दा दायर गरेको थियो।

अख्तियारले असोज २२ गते पूर्वमन्त्री गुप्ता लगायत सात जनाविरुद्ध भ्रष्टाचार मुद्दा दायर गरेको थियो। यो प्रकरणमा दुई जनाबीचको अडिओ सार्वजनिक भएपछि अनुसन्धान सुरु गरिएको थियो। अडिओमा बिचौलियाले भनेको सुनिएको थियो – “पोखराको जग्गाले तपाईंलाई टुलुटुलु हेरेर बसेको छ, अहिले २५ राख्नुस्, काम बनेपछि माझीकुनामा माछा खाउँला।”