काठमाडौं । नेकपा एमालेको ११औं राष्ट्रिय महाधिवेशनको बन्दसत्र सुरु भएको छ। भृकुटीमण्डपमा केहीबेर अघिबाट बन्दसत्र सुरु भएको हो। बन्दसत्रको प्रारम्भमा पार्टी अध्यक्ष केपी शर्मा ओलीले प्रतिनिधिहरूलाई सम्बोधन गरिरहेका छन्।

आज बिहान ९ बजे सुरु हुने भनिएको बन्दसत्र केन्द्रीय कमिटी बैठक लगायतका कारण ढिलो गरी दिउँसो ३ बजेपछि मात्रै सुरु भएको हो।

यसअघि शनिबार भक्तपुरको सल्लाघारीमा महाधिवेशनको उद्घाटन सत्र सम्पन्न भएको थियो। बन्दसत्र सुरु हुनुअघि बसेको केन्द्रीय कमिटी बैठकले विधान महाधिवेशनका केही निर्णय उल्ट्याउने निर्णय गरेको छ।

केन्द्रीय कमिटी बैठकले पार्टीको संगठन संरचनामा संशोधन गर्दै केन्द्रीय सदस्यको संख्या बढाउने तथा स्थायी कमिटीलाई निरन्तरता दिने निर्णय गरेको जनाएको छ।

बन्दसत्रमा पार्टीको राजनीतिक प्रतिवेदन, सांगठनिक संरचना, नेतृत्व चयन प्रक्रिया तथा समसामयिक राजनीतिक परिस्थितिबारे छलफल हुने जनाइएको छ।