जेनेभा । अमेरिकाले रूस–युक्रेन युद्धका लागि तयार पारेको २८ बुँदे शान्ति योजनामा संशोधन गरिएको छ। आइतबार जेनेभामा अमेरिकी र युक्रेनी उच्चस्तरीय प्रतिनिधिमण्डलबीच भएको वार्तामा नयाँ खाका तयार भएको रोयटर्सले जनाएको छ।

संशोधित योजनामा युक्रेनको सुरक्षा ग्यारेन्टी बलियो बनाइने, सेनाको आकार ६ लाखभन्दा बढी राख्न पाउने र सीमा–भूभागसम्बन्धी निर्णय फ्रन्टलाइनको आधारमा हुने उल्लेख छ। यसअघि ट्रम्प प्रशासनले युक्रेनलाई भूभाग छाड्नुपर्ने र सेना घटाउनुपर्ने प्रस्ताव राखेपछि तीव्र आलोचना भएको थियो।

वार्तामा अमेरिकी विदेशमन्त्री मार्को रूबिओ र रक्षामन्त्री पिट हेगसेथ सहभागी थिए। रूसले हालै आक्रमण तीव्र पारेका बीच संशोधित योजना तयार भएको हो।

शान्ति योजना अघि बढाउन ट्रम्प र युक्रेनी राष्ट्रपति जेलेन्स्कीबीच यसै साताभित्र भेट वार्ता हुने ह्वाइट हाउसले जनाएको छ। युक्रेनलाई बिहीबारसम्म सहमत जनाउन समय दिइएको भए पनि आवश्यक परे समय बढाइने अमेरिकाले संकेत गरेको छ।