काठमाडौं । एमाले नेता भानुभक्त ढकाल र महेश बस्नेतमाथि विराटनगर विमानस्थलमा गरिएको दुर्व्यवहारप्रति नेकपा एमाले निकट विद्यार्थी संगठन अनेरास्ववियुले कडा प्रतिक्रिया व्यक्त गरेको छ। संगठनले घटनालाई कानूनी राज्यमाथिको प्रत्यक्ष प्रहार र सरकारद्वारा प्रोत्साहित अराजक प्रवृत्तिको ज्वलन्त उदाहरणका रूपमा प्रस्तुत गरेको छ।

अध्यक्ष दीपक धामीद्वारा जारी विज्ञप्तिमा वर्तमान सरकारले “अलोकतान्त्रिक, असंवैधानिक र अराजकतामुखी शासन शैली” अपनाएको आरोप लगाउँदै यस्तो वातावरणले देशलाई खतरनाक दिशातर्फ धकेलिरहेको चेतावनी दिइएको छ। विज्ञप्तिमा भनिएको छ, “एमाले नेतामाथि भएको कायरतापूर्ण दुर्व्यवहार कुनै सामान्य घटना होइन, यो राज्य संरचनालाई बदनाम गर्ने नियोजित प्रयास हो। यस्ता कुकृत्य दोहोरिनु सरकारकै मौन सहमति र संरक्षणको परिणाम हो।”

धामीले घटनाले कानूनी शासनको उपहास भएको भन्दै सरकारले दमनकारी मानसिकता त्याग्न नसके अनेरास्ववियु कठोर प्रतिवादमा उत्रिने स्पष्ट चेतावनी दिएका छन्। संगठनका अनुसार शान्तिपूर्ण राजनीतिक कार्यक्रमका लागि यात्रा गर्दै गरेका नेतामाथि सार्वजनिक स्थलमै भएको दुर्व्यवहारले देशमा कोही पनि सुरक्षित छैन भन्ने भयावह सन्देश दिन खोजिएको छ।

अनेरास्ववियुले घटनाको घोर निन्दा गर्दै दोषीलाई कारवाही नगरे सरकार नै अराजकताका सबै घटनाको प्रत्यक्ष जिम्मेवार ठहरिने चेतावनी दिएको छ।