काठमाडौं । आगामी फागुन २१ गते हुने प्रतिनिधि सभा सदस्य निर्वाचनका लागि निर्वाचन आयोगले पूर्वप्रमुख आयुक्त र आयुक्तहरूसँग छलफल गरेको छ। आयोगले विगतको चुनाव अनुभव, शान्ति सुरक्षा र राजनीतिक दलहरूसँग समन्वयका विषयमा सुझाव लिन छलफल गरेको जनाएको छ।

कार्यवाहक प्रमुख निर्वाचन आयुक्त रामप्रसाद भण्डारीका अनुसार निर्वाचन तयारीको ६० प्रतिशत काम पूरा भइसकेको छ भने बाँकी काम पनि निरन्तर अगाडि बढिरहेको छ। आयोगले चुनावका लागि आवश्यक ७९ प्रकारका सामग्रीको सूची तयार पारिसकेको छ र तीमध्ये १४ प्रकारका वस्तु खरिद प्रक्रियामा छन्।

निर्वाचनमा मतपेटिका, औँलामा चिह्न लगाउने मार्कर पेन, स्ट्याम्प प्याड, लाहा छाप, मतदान कक्षका सामग्री लगायत विविध उपकरण आवश्यक पर्ने आयोगले जानकारी दिएको छ।

यसअघि आयोगले राजनीतिक दलहरूसँग पनि छलफल गरी मतदाता नामावलीमा छुटेका नाम दर्ता गर्न प्रचार गर्ने अनुरोध गरेको थियो।