काठमाडौं । मनाङ क्षेत्रमा परेको भीषण हिमपातपछि फसेका करिब १५ सय जनाको नेपाली सेनाले सफलतापूर्वक उद्धार गरेको छ।

सैनिक मुख्यालयका अनुसार मनाङको तिलिचो, खाङ्गसार, पिसाङ्ग, अप्पर मनाङ र हुम्दे क्षेत्रका स्थानीयवासी तथा पर्यटकहरूलाई उद्धार गरी सुरक्षित स्थानमा ल्याइएको हो। उद्धार भएकामध्ये करिब २०० जना विदेशी पर्यटक रहेको बताइएको छ। मनाङस्थित नेपाली सेनाको नयाँ भैरवीदल गुल्मबाट खटिएको उद्धार टोलीले प्रहरी, सशस्त्र प्रहरी र स्थानीयवासीहरूको सहयोगमा उद्धार कार्य सम्पन्न गरेको हो ।

सैनिक मुख्यालयका प्रवक्ताले भने, “हिमपातका कारण फसेकाहरूलाई हेलिकप्टर र स्थल मार्ग दुवै माध्यम प्रयोग गरी सुरक्षित स्थानमा पुर्‍याइएको छ।” उद्धार कार्यपछि मनाङ क्षेत्रका सम्पर्क अवरुद्ध भएका बाटाहरू क्रमशः खुलाउने प्रयास भइरहेको बताइएको छ।