काठमाडौं । सुन तस्करी प्रकरणमा संलग्न भएको आरोपमा पूर्वसभामुख तथा माओवादी केन्द्रका उपाध्यक्ष कृष्णबहादुर महराविरुद्ध काठमाडौं जिल्ला अदालतमा मुद्दा दायर गरिएको छ। सोमबार महराविरुद्ध भन्सार छलि गरेको र संगठित अपराधमा संलग्न रहेको अभियोगमा भन्सार ऐन, २०६४ र संगठित अपराध निवारण ऐन, २०७० अन्तर्गत मुद्दा दर्ता गरिएको हो।

सरकारी पक्षले महराविरुद्ध ८ करोड ५५ लाख २८ हजार ३७४ रुपैयाँ बराबरको बिगो तथा ३ वर्षभन्दा बढी कैद सजाय मागदाबी गरेको छ। महरामाथि २०७९ सालमा विद्युतीय चुरोट (भेप) मा लुकाएर ल्याइएको ९ किलो सुन तस्करीमा संलग्न रहेको आरोप लगाइएको छ।

उनलाई आइतबार पक्राउ गरी अनुसन्धान प्रक्रिया अघि बढाइएको हो। यसअघि पनि २०८० साल चैतमा महरालाई प्रहरीले नियन्त्रणमा लिई सो प्रकरणमा अनुसन्धान गरेको थियो। प्रहरीले यस घटनालाई सुन तस्करीको संगठित सञ्जालको हिस्सा मान्दै अनुसन्धान विस्तार गरिरहेको छ।