हुम्ला । हुम्लाको चंखेली गाउँपालिका–४ बेशी खोलामा शुक्रबार बिहान भएको जिप दुर्घटनामा घाइते भएकामध्ये ५ जनालाई नेपाली सेनाको हेलिकप्टरमार्फत सुर्खेत लगिएको छ।

घाइतेहरूमा ३६ वर्षीय महेन्द्र रोकाया, २९ वर्षीय कैलाश सिरा, २६ वर्षीया पार्वती सिरा, १९ वर्षीय बाबु लामा र ४ वर्षीया जागृती रोकाया रहेका छन्। उनीहरूलाई गम्भीर चोटपटक लागेकाले थप उपचारका लागि सुर्खेत लगिएको प्रहरीले जनाएको छ। कर्णाली प्रदेश ०२००१ च १०९१ नम्बरको डबल क्याप जिप मेल्छामबाट पिप्लाङतर्फ जाँदै गर्दा अनियन्त्रित भई सडकबाट करीब ३०० मिटर तल खस्दा दुर्घटना भएको हो। दुर्घटनामा १२ जना घाइते भएका थिए, जसमा ७ जनाको अवस्था गम्भीर छ।

प्रहरीका अनुसार प्रारम्भिक उद्धारपछि सबै घाइतेलाई स्थानीय पिप्लाङ बर्थिङ सेन्टरमा पुर्‍याइएको थियो। तर गम्भीर अवस्थाका कारण थप उपचारका लागि सेनाको हेलिकप्टरमार्फत सुर्खेत पठाइएको हो।