काठमाडौं । नेकपा एमालेका अध्यक्ष केपी शर्मा ओलीले जेन–जी आन्दोलनका क्रममा भएको सरकारी दमनमाथि छानबिन गर्न गठित गौरीबहादुर कार्की नेतृत्वको आयोगप्रति कडा आपत्ति जनाउँदै त्यसलाई अस्वीकार गर्ने घोषणा गरेका छन्।

भक्तपुरको गुन्डुमा आयोजित कार्यक्रममा ओलीले आयोग गठनको उद्देश्य नै आफू र एमालेमाथि राजनीतिक प्रतिशोध लिने योजना भएको आरोप लगाए। उनले भने, ‘पहिले नै केपी ओली समात्नुपर्छ, थुन्नुपर्छ भन्ने मान्छेहरुले आयोग बनाएर प्रतिवेदन लेख्ने? त्यो आयोग नक्कली हो, त्यसको प्रतिवेदन एमालेलाई कुनै हालतमा स्वीकार्य हुने छैन।’

सरकारले २३ भदौको जेन–जी आन्दोलनका क्रममा सुरक्षाकर्मीको दमनबारे छानबिन गर्न कार्कीको नेतृत्वमा आयोग गठन गरेको थियो। तर कार्कीले सो आन्दोलनका दिनहरूमा सामाजिक सञ्जालमा लेखेका विवादास्पद टिप्पणीका कारण सुरुबाटै निष्पक्षताको प्रश्न उठ्दै आएको थियो।

अध्यक्ष ओलीले भने, ‘आन्दोलनकै विरोधमा धारणा सार्वजनिक गर्ने मान्छेले अहिले आएर छानबिन गर्छ भने त्यो न्याय होइन, पूर्वाग्रह हो। यस्तो पक्षपाती आयोग एमालेले मान्दैन।’

उनले थपे, ‘यो आयोगले तयार पार्ने प्रतिवेदन कुनै पनि हालतमा हाम्रो लागि वैधानिक हुने छैन। सरकारले चाहेको जस्तो नाटक एमालेले कहिल्यै नखेल्नेछ।’

ओलीका अनुसार, जेन–जी आन्दोलनका क्रममा नागरिकमाथि भएको बल प्रयोग र सरकारले अपनाएको दमनकारी शैलीकै जाँच गर्नुपर्ने बेला उल्टै विपक्षीमाथि दोष थोपर्ने खेल भइरहेको छ।

‘न्यायका नाममा राजनीति गर्नेहरूको नाङ्गोपन देशले बुझिसकेको छ,’ ओलीले चेतावनी दिए, ‘अब जनता र एमाले दुवै यस्ता प्रवृत्तिको प्रतिवाद गर्न तयार छन्।’