काठमाडौं । देशका विभिन्न भागमा सक्रिय मनसुनका कारण पछिल्लो २४ घण्टामा लगातार भारी वर्षा भएको छ। विशेषगरी तराईका जिल्लाहरूमा अत्यधिक वर्षा मापन भएको जल तथा मौसम विज्ञान विभागले जनाएको छ।

विभागका अनुसार रौतहटको महेशपुरमा सबैभन्दा बढी २८९ मिलिमिटर वर्षा मापन गरिएको छ भने गौरमा पनि २५९ मिलिमिटर वर्षा भएको छ। यससँगै वीरगञ्जमा २४७ मिमि, पर्सामा २३१ मिमि र बारामा २२२ मिमि वर्षा भएको छ। मकवानपुरमा १३४ मिलिमिटर र काभ्रेपलाञ्चोकमा १२२ मिलिमिटर वर्षा मापन गरिएको विभागका सूचना अधिकारी दिनकर कायस्थले जानकारी दिनुभयो। साथै, काठमाडौं उपत्यकासहितका विभिन्न जिल्लामा ५० मिलिमिटरभन्दा बढी वर्षा भएको पनि विभागले जनाएको छ।