सिरहा । सिरहामा अपहरणमा परेका एक बालकको हत्या भएको छ। गोलबजार नगरपालिका–१३ भेल्हा डंगराहाका संजय सिंहका १५ वर्षीय छोरा अभिषेक सिंहको शव आज बिहान फेला परेको जिल्ला प्रहरी कार्यालय सिरहाले जनाएको छ।

प्रहरीका सूचना अधिकारी धर्मेशकुमार यादवका अनुसार अभिषेकको शव घर नजिकैको आँप बगैंचामा भेटिएको हो । घटनास्थललाई प्रहरी टोलीले घेराबन्दी गरी अनुसन्धान सुरु गरेको र थप विवरणका लागि डग टोली समेत परिचालन गर्ने तयारी भएको छ। अभिषेक आइतबार राति करिब ८ बजेदेखि बेपत्ता भएका थिए। परिवारले रातभर खोज्दा फेला नपरेपछि सोमबार बिहान करिब ८ बजे अभिषेककै मोबाइलमार्फत आमालाई अपहरण भएको र फिरौती मागिएको म्यासेज आएको थियो । त्यसपछि परिवारले प्रहरीलाई खबर गरेको थियो ।

प्रहरीले घटनाको विस्तृत अनुसन्धान थालेको र संलग्न व्यक्तिहरूको खोजी कार्य तीव्र पारिएको जनाएको छ।