रौतहट । सोमबारको सरकारी दमनको विरोधमा जेनजी युवाहरुले मंगलबार बिहानदेखि रौतहटका विभिन्न स्थानमा टायर बालेर प्रदर्शन गरेका छन् ।

चन्द्रपुर, गौर, गरुडा लगायतका क्षेत्रमा युवाहरु भेला भई सरकार र प्रहरी प्रशासनविरुद्ध चर्का नारा लगाएका छन् । भ्रष्टाचार र बेथितीविरुद्ध जेनजी पुस्ताले देशव्यापी रुपमा सुरु गरेको आन्दोलनको समर्थनमा यो प्रदर्शन गरिएको हो ।

प्रदर्शनका कारण पूर्व–पश्चिम राजमार्गको यातायात प्रभावित भएको छ भने सुरक्षा संवेदनशीलतालाई ध्यानमा राख्दै प्रहरीले प्रमुख चोक–चोकमा बाक्लो सुरक्षाकर्मी तैनाथ गरेको छ। जिल्ला प्रहरी कार्यालय रौतहटका अनुसार अहिलेसम्म प्रदर्शन शान्तिपूर्ण छ र कुनै अप्रिय घटना घटेको छैन।